Монгол Улсын орчин цагийн архивын албан үүсэн байгуулагдсаны түүхт 95 жилийн ойг тохиолдуулан, архивын байгууллагын тулгын чулууг тавилцсан, архивын байгууллагын ууган ажилтны нэг Ө.Чимид агсны амьдралын түүхийг өгүүлсэн “Ө.ЧИМИД ХИАГИЙН АМЬДРАЛЫН ТҮҮХ” сэдэвт ном хэвлүүлж, 2022 оны 12 дугаар сарын 21-ний өдөр түүний ар гэрийн төлөөлөлд нь хүндэтгэл үзүүлэх арга хэмжээг Архивын ерөнхий газрын Хүндэтгэлийн өргөөнд зохион байгууллаа.
Тус номын зохиогчоор ШУА-ийн Түүх, угсаатны зүйн хүрээлэнгийн эрдэм шинжилгээний ажилтан М.Алтаншагай, номын ерөнхий редактораар тус хүрээлэнгийн салбарын эрхлэгч, доктор (Ph) Да.Эрдэнэбат, редактораар Үндэсний төв архивын захирал Т.Сайнжаргал нар ажиллаж, ахмад архивчийн намтар, бүтээлийн өвөөс хэвлэн нийтлүүллээ.
Ө.Чимидийн гэр бүлийнхэнд хүндэтгэл үзүүлэх арга хэмжээнд түүний зээ хүү Б.Баясгалан, зээ дүү Х.Баярсанаа, Архивын ерөнхий газрын дарга С.Энхбаатар, Үндэсний төв архивын захирал Т.Сайнжаргал, Сургалт судалгааны газрын дарга Ч.Оюунчимэг нар болон бусад төлөөлөл оролцлоо.
Тэрээр бичиг соёлын ертөнцөд “Ө.Чимид” хэмээн алдаршсан бөгөөд 1899 онд Түшээт хан аймгийн Говь Түшээ гүний хошуу буюу одоогийн Дундговь аймгийн Дэлгэрхангай сумын нутагт мэндэлжээ.
Ө.Чимид нь бичээч, зохиолч, орчуулагч, дипломатч, багш бөгөөд анхан Автономит засгийн үед хиа, шадар явснаа Барон Унгерны байгуулсан засагт бичээчээр орж ажиллан улмаар Ардын Засгийн угтал үед Богд хааны айлтгал, лүндэнг бичин явж удалгүй хаантныг жанч халсны дараагаар засаглал солигдоход шинэ засаг төрд намын их хурлын нарийн бичиг хийж явсан сонирхолтой намтартай төдийгүй ЗХУ-д суух элчингийн нарийн бичгийн дарга, дипломатч, Улсын төв хэвлэлийн газрын дарга, Улсын их сургуулийн багш, Улсын нийтийн номын сангийн зааварлагч, 1949 оны 11 дүгээр сараас Улсын архивын хэрэг эрхлэх газарт ажилд орж насан эцэслэх хүртлээ судлагч, Судлах хэлтсийн дарга гэх зэрэг удирдах ажил болон хариуцлагатай албан тушаалыг хашиж явсан Монголын үндэсний томоохон сэхээтнүүдийн төлөөлөл байв.
Сэтгэгдэл (0)