Хамтын ажиллагаа - Zaisantv.mn

УИХ-ын дарга Д.Амарбаясгалан Монгол Улс дахь НҮБ-ын Суурин зохицуулагч Тапан Мишраг хүлээн авч уулзлаа

secret0721 — Wed, 04 Dec 2024 18:00:07 +0800

Монгол Улсын Их Хурлын дарга Д.Амарбаясгалан өнөөдөр (2024.12.04) НҮБ-ын Суурин зохицуулагч Тапан Мишраг хүлээн авч уулзан Монгол Улсын нийгэм, эдийн засаг, тогтвортой хөгжил, байгаль орчин, хүмүүнлэгийн болон энхийг дэмжих салбарын олон талт хамтын ажиллагааг өргөжүүлэн бэхжүүлэхэд ихээхэн хувь нэмэр оруулж, “Найрамдал” медалиар шагнуулсанд баяр хүргэлээ.

Монгол Улс дахь НҮБ-ын Суурин зохицуулагчийн газар нь “Тогтвортой хөгжлийн 2030 хөтөлбөр”-ийн үндэсний хэрэгжилтэд дэмжлэг болох хамтарсан төсөл, хөтөлбөр боловсруулан хэрэгжүүлэх, зохицуулах зэрэг үйл ажиллагааг Засгийн газрын зорилт, тэргүүлэх чиглэл, НҮБ-ын системийн байгууллагын зорилготой уялдуулан ажилладгаас гадна үйл ажиллагаандаа стратеги төлөвлөлт, түншлэл, хөгжлийн санхүүжилт, дата удирдлага, үр дүнгийн хяналт, тайлагналт, мэдээлэл харилцааны чиглэлийг анхаарч ажилладаггэж Улсын Их Хурлын Хэвлэл мэдээллийн газраас мэдээлэв.

Ши Жиньпин Камбожийн Ардын намын дарга Хун Сентэй хэлэлцээ хийв

secret0721 — Wed, 04 Dec 2024 17:58:04 +0800

12-р сарын 3-нд ХКН-ын төв хорооны ерөнхий нарийн бичгийн дарга, Хятад улсын дарга Ши Жиньпин Бээжингийн Дяо Юй Тай төрийн зочид буудалд Камбожийн Ардын намын дарга, Сенатын дарга Хун Сентэй хэлэлцээ хийв.

Ши Жиньпин хэлэхдээ, Хятад, Камбожийн өнө мөнхийн найрамдалт харилцаа нь хоёр орны ард түмний нийтлэг ашиг сонирхолд бүрэн нийцэж байна. Хятад улс Камбожийг хөрш орнуудын дипломат харилцааны гол чиглэл хэмээн үзсээр ирсэн бөгөөд Камбожийн талтай хамтаар шинэ эриний өндөр чанартай, дээд түвшний, өндөр стандарт бүхий Хятад Камбожийн хувь заяаны нэгдмэл цогцыг байгуулахад бэлэн байна. Нэгд, хоёр тал бие биенээ тууштай дэмжиж, өнө мөнхийн нөхөрлөлөө бататгах ёстой. Мөн Камбожийн үндэсний бүрэн эрх, аюулгүй байдал, хөгжлийн ашиг сонирхлоо хамгаалахад Хятад улс тууштай дэмжлэг үзүүлнэ. Хоёрт, солилцоо, харилцан суралцахаа гүнзгийрүүлж, хамтын хөгжил, сэргэн мандалтыг эрэлхийлэх ёстой. Хятадын Коммунист нам Камбожийн үндэснийхээ нөхцөл байдалд тохирсон хөгжлийн замыг эрэлхийлэхэд нь туслахын тулд Камбожийн Ардын намтай стратегийн харилцаа холбоо, боловсон хүчний бэлтгэл сургалтын хамтын ажиллагаагаа эрчимжүүлэхэд бэлэн байна. Гуравт, хамтын ажиллагааны боломжуудыг ашиглан, харилцан ашигтай шинэ байдлыг нээх ёстой. Хятад улс Камбожийн талтай хамтран хувь заяаны нэгдмэл цогцын үйл ажиллагааны төлөвлөгөөний шинэ хувилбарыг хэрэгжүүлэхэд бэлэн байна.

Ши Жиньпин цааш нь хэлэхдээ, Камбожийн олон улсын болон бүс нутгийн үйл хэрэгт илүү их үүрэг гүйцэтгэхийг Хятад улс үргэлжлүүлэн дэмжих бөгөөд АСЕАН-ы стратегийн бие даасан байдал, төвийн байр сууриа хадгалахыг дэмжиж, гадаадын хүчний хүйтэн дайны үеийн сэтгэхүйг бүс нутагт нэвтрүүлэхийг эрс эсэргүүцэж, АСЕАН-ы интеграцлал болон хамтын цогцын бүтээн байгуулалтыг тууштай дэмжинэ гэжээ.

Хун Сен хэлэхдээ, Камбож Хятадын найрамдлыг хоёр талын ахмад үеийн удирдагчид хамтран байгуулж, түүх, цаг хугацааны сорилтыг даван туулсан юм. Энэ нь Камбож Хятадын хувь заяаны нэгдмэл цогц нь хоёр талын хамтын ашиг сонирхолд нийцэж буйг харуулж байна. Камбожийн улс төр, эдийн засаг, нийгмийн хөгжилд урт хугацааны турш үнэ цэнэтэй дэмжлэг туслалцаа үзүүлсэн Хятад улсад талархаж байна. Хятад улстай нам хоорондын солилцоогоо иж бүрэн бэхжүүлж, улс төрийн харилцан итгэлцлээ гүнзгийрүүлэн, олон салбарын ажил хэрэгч хамтын ажиллагааг ахиулж, Хятад улстай олон улсын болон бүс нутгийн үйл хэрэгт зохицуулалт, хамтын ажиллагаагаа эрчимжүүлэхэд Камбож улс бэлэн байна гэжээ.

Т.Чулуун-эрдэнэ: шинэ чанарын үйлдвэрлэх хүчиийг бүс ба замын хүрээнд хэрэгжүүлэхээр байгаа юм

secret0721 — Wed, 04 Dec 2024 17:55:11 +0800

1. Бүс ба зам Өнгөрсөн 10, 11 жилд ерөнхийдөө хатуу дэд бүтцийн бүтээн байгуулалтад их төвлөрөх шиг боллоо

Сэтгүүлч: Бүс ба зам санаачилгын өнгөрсөн 10 жилийн ололт амжилтыг хэрхэн дүгнэж байна?

Т.Чулуун-Эрдэнэ: Хятад улсын дарга Ши Жиньпиний 2013 онд дэвшүүлсэн “Бүс ба Зам” санаачилга хэрэгжиж эхлээд 10 жилээ үдээд өнгөрсөн 2023 онд зохион байгуулагдсан 3 дэх форум дээр үр дүнгээ танилцуулсан. Энэ 10 жилийн хугацаанд дэлхийн 152 улс оронтой 200 гаруй хамтын ажиллагааны баримт бичигт гарын үсэг зурсан, ер нь бол Евро-Азийг голлосон, мөн Африк, Латин Америкийг дамнасан дэлхийг дэд бүтцээр холбох томоохон бүтээн байгуулалтын ажлыг хийлээ. Өнгөрсөн 10, 11 жилд ерөнхийдөө хатуу дэд бүтцийн бүтээн байгуулалтад их төвлөрөх шиг боллоо. Жишээ нь зам гүүр, галт тэрэг, хурдны зам, боомт зэрэгт дэд бүтцэд хөрөнгө оруулалт хийсэн байна. Нийт 1 их наяд ам. долларын хөрөнгө оруулалт хийсэн гэж үзэж байгаагийн бараг 60 гаруй хувийг хатуу дэд бүтэц эзэлж байгаа. Онцлууштай, амжилттай хэрэгжсэн бүтээн байгуулалтуудын талаар дэлхий даяар шуугьж байна, жишээ нь хамгийн амжилттай хэрэгжиж байгаа Хятад-Пакистаны эдийн засгийн коридор, мөн Хятад-Лаосыг холбосон төмөр зам, Жакарта-Бандунг хурдны галт тэрэг гэх мэт, хамгийн сүүлд Перүгийн Чанкай боомтод хөрөнгө оруулалт хийхээр тохирч байх шиг байна. Зам харилцаа сайжирч, дэлхийн улс орнууд дэд бүтцээрээ холбогдсоноор ганц Хятад улс төдийгүй бүтээн байгуулалтад оролцож байгаа хамтран ажиллагч улс орнуудын эдийн засгийн өсөлт, худалдааны эргэлт сайжирч, улс орнуудын хамтран ажиллах орон зай тэлсэн. Мэдээж тив дамнасан том бүтээн байгуулалт, хэлхээ холбоо бий болсноор Хятад улс дэлхийн худалдаанд голлох үүрэг гүйцэтгэж, маш олон улс орнуудын худалдааны хамгийн тос түнш нь болж таарч байна. Хөрөнгө оруулалтад мэдээж ганцхан дэд бүтэц, зам, төмөр зам гэхээс илүүтэй байгальд ээлтэй ногоон хөгжилд анхаарсан төслүүд мөн тодорхой хувийг эзэлсэн байгаа, ойролцоогоор 22 хувийг эзэлж байгаа гэсэн тоо баримт байна. 2013 оноос нааш 10 жилийн хугацаанд хамтран ажиллагч улс орнуудтай 19 их наяд ам.долларын худалдаа хийсэн гэж байна. Хятад улс төдийгүй дэлхийн хэмжээнд зам харилцааг сайжруулснаар 2030 он гэхэд дэлхийн хэмжээнд 40 сая ард иргэдийг ядуурлаас бууруулна гэсэн тоо баримт явж байна.

2. Бүс ба зам 2040 он гэхэд дэлхийн ДНБ-д

7.1 их наяд ам.долларын хувь нэмэр оруулна

Сэтгүүлч: Бүс ба замын ирэх арван жил, түүнчлэн цаашдын хөгжил, хандлага ямар байх бол?

Т.Чулуун-Эрдэнэ: Сая хэлснээр өнгөрөн 10 жилд ерөнхийдөө хатуу дэд бүтцэд нэлээд их анхаарсан бол судалгаанаас харахад ирэх 10 жилд 2023 оны 9-р сард Хятад улсын дарга Ши Жиньпингийн дэвшүүлсэн шинэ чанарын үйлдвэрлэх хүчин буюу Шинжлэх улаан, технологи, инноваци, ногоон дижитал салбарт түшиглэсэн чиглэл буюу хөтөлбөрийг бүс ба замын хүрээнд хэрэгжүүлэхээр байгаа юм. Хятад улс үүнээ Small and Beautiful гэж оноож байгаа юм, жижиг мөртлөө үзэсгэлэнтэй гэсэн утгатай. Тэгэхээр бүс ба замын хүрээнд хэрэгжих төслүүд нь хэмжээний хувьд арай авсаархан жижигхэн боловч эрчим хүч болоод технологийн салбарт илүү их хөрөнгө оруулж, жишээ нь ногоон хөгжлийг дэмжих төсөлд илүү хөрөнгө оруулах хандлага харагдаж байна. Энэхүү хөрөнгө оруулалтын хэлбэр загвар нь хөгжлийн төвшин дундаж орнуудад түлхүү байх болно хэмээн дэлхийн улс орнуудын судлаачид үзэж байна. Жишээ нь цахилгаан авто машин, зай хураагуурын үйлдвэр, дижитал дэд бүтэц гэх мэт. Би саяхан Фү Дань их сургуулийн “Бүс ба зам-Дэлхийн засаглал” судалгааны хүрээлэн зохион байгуулсан форумд оролцсон, мөн Гүй Яанд зохион байгуулагдсан “Хятад улсыг харья, дэлхийн улс орнуудыг сонсъё” гэх форумд оролцсон. Хоёр арга хэмжээний үндсэн сэдэв нь хоёулаа “Шинэ чанарын үйлдвэрийн хүчин” гэх сэдвийн доор болж өнгөрлөө. Энэ шинэ ухагдахууныг энгийн үгээр хэлэх юм бол шинжлэх ухаан, технологи, инноваци дээр тулгуурлан үйлдвэрлэлийн үр ашгийг нэмэгдүүлж, өндөр чанартай хөгжилд хүрэх юм. Тэгэхээр цаашдаа бүс ба зам нь илүү өндөр чанартай, байгальд ээлтэй, дэлхийн тогтвортой хөгжлийн зорилтод хүрэхэд чиглэсэн хөрөнгө оруулах юм байна. 2023 онд технологид оруулж байгаа хөрөнгө оруулалт 1000 дахин өссөн гэж байгаа. Хятадын эрдэмтдийн үзэж байгаагаар Хятад улс мөн цаашид хөдөө аж ахуйн салбарын шинэчлэл, аж үйлдвэржилт, хамтран ажиллагч улс орнуудын эдийн засгийг солонгоруулах чиглэлд хөрөнгө оруулалт хийх таамаглалтай байна. Хятадын улсын энэ том төсөл санаачилга дэлхийн эдийн засгийн өсөлтөд томоохон хувь нэмэр оруулж байна. Мөн хамтран ажиллагч орнуудад хийсэн зам харилцаа, ногоон байгууламж, ухаалаг хот зэрэг олон төсөл хөтөлбөр хэрэгжүүлсний үр дүнд 2040 он гэхэд дэлхийн ДНБ-д 7.1 их наяд ам.долларын хувь нэмэр оруулна гэсэн судалгааны тоо баримт байна.

3. Монгол улс бүс нутагт үүсээд байгаа томоохон боломжуудыг ашиглах зайлшгүй шаардлагатай

Сэтгүүлч: Бүс ба зам санаачилга дахь Монголын улсын оролцоо хир байна? Цаашдын боломж, орон зай хир их байна?

Т.Чулуун-Эрдэнэ: Монгол улс газар зүйн байршлын хувьд дэлхийтэй холбогдоход нэлээдгүй саад бэрхшээлтэй тулгардаг улс. Хоёр том хөрштэй хиллэдэг, далайд гарцгүй түгжигдмэл, харин бүс ба за бол угаасаа тээврийн томоохон коридорыг түшиглэн урт хугацааны эдийн засгийн тогтвортой хөгжлийн бодлогыг хангаж байгаа ийм санаачилга гэдгийг бид мэднэ. Ийм нөхцөлд Монгол улс хоёр хөрштэйгөө эдийн засгийн интегралчлал, нэгдэлд орж бүс нутагт үүсээд байгаа томоохон боломжуудыг ашиглах зайлшгүй шаардлагатайгаас гадна өөр арга замгүй гэж бодож байна. Тэгэхлээр бүс ба зам санаачилгад нэгдэж орох нь манай улсын хувьд эдийн засгаа цаашид улам хөгжүүлэх томоохон боломжуудыг авчирна. Бүс ба зам санаачилгад Монгол улс нь Монгол, Хятад, Оросын эдийн засгийн коридорын хүрээнд оролцохоор төлөвлөсөн байгаа. 2014 онд гурван улсын төрийн тэргүүн нар эдийн засгийн коридорыг байгуулах зөвшилцөлд хүрч 16 онд коридорыг бүтээн байгуулах төлөвлөгөөнд гарын үсэг зурснаар энэ төсөл эхэлсэн гэж үзэж болно. Тэгэхээр Монгол улс талын зам өөрсдийн бодлогоо үүнтэй уялдуулахаар хэлж амласаар ирсэн. Харин яг бодит байдал дээр хэрэгжилт тийм сайн биш, нэлээд удааширч байгаа гэж үзэж байна. Нийт 32 төслийн хувьд ихэнх хувь буюу 13 нь дэд бүтэцтэй холбоотой, үлдсэн хэсэг нь бусад салбартай холбогдсон байгаа юм. Бүс ба зам цаашид технологи, инноваци, ногоон дижитал хөгжилд тулгуурласан салбарт илүүтэй хөрөнгө оруулалт хийнэ гэж байгаа. Гэтэл манай 32 төслийн дунд Монгол-Оросын цахилгаан эрчим хүчийг шинэчлэхэд Хятад талын аж ахуйн нэгжийн оролцох боломжийг судлах гээд эрчим хүчтэй холбоотой ганцхан төсөл байгаа, ногоон болон дижитал салбарын төсөл байхгүй байгаа нь хангалтгүй байна гэж үзэж байна. Би “Бүс бас зам санаачилга, Монгол улсын оролцоо” гэдэг номын дүгнэлт хэсэгтээ мөн 32 төслийн хэрэгжилт тааруу, удаан байна гэж үзсэн. Үүний тод жишээ нь коридорын хүрээнд гурван тал хэлэлцэж тохироод гурван төслийг нэн тэргүүнд ахиулна гэсэн, үүний нэг нь төсөр замыг шинэчлэн хос замтай болгож, цахилгаанжуулна гэсэн байдаг. Энэ ерөөс хэрэгжиж эхлээгүй байгаа. Мөн олон улсын хурдны замын ажил мөн хэрэгжээгүй, эрчим хүчний сүлжээг шинэчлэх ажил мөн тодорхойгүй байна. Бид нарын маш их найдлага тавьж байсан Сибирийн хүч 2 газ дамжуулах хоолой сүүлийн үеийн мэдээллээр Монголоор биш Казахстанаар дамжих магадлал өндөр болсон байгаа. Монгол улсын дэлхийтэй холбогдох гол гарц бол ерөөсөө хоёр хөрштэй холбогдож байгаа хилийн боомтууд юм. Манай улсын засгийн газрын “Алсын хараа 2050”, Шинэ сэргэлтийн бодлого, хамгийн сүүлийн шинэ засгийн газрын 2024-2028 хүртэлх үйл ажиллагааны төлөвлөгөөний 14 мега төсөл зэрэгт боомтын бүтээн байгуулалтын ажил нэлээд төвлөрч бүтээн байгуулалтын ажил нэлээд ахицтай явах нааштай хандлагатай байна. Боомтын бүтээн байгуулалтыг бүс ба замын хүрээнд оруулж болно гэж би үзэж байна. Монгол улс Гашуунсухайт- Ганцмод, Ханги-Мандал, Шивээхүрэн-Цэхээ гэсэн гурван боомтод хил дамнасан төмөр зам барихаар төлөвлөсөн байгаа. Үүнийг 14 мега төслийн тэргүүн эгнээнд тавьж буй нь Монгол улсын засгийн газар боомтын сэргэлтэд өндөр ач холбогдол өгч байгааг харуулж байна. Сая 11-р сарын 5-нд Монгол улсын ерөнхий сайд Л.Оюун-эрдэнэ БНХАУ-ын төрийн зөвлөлийн ерөнхий сайд Ли Чянтай Шанхай хотод албан ёсны уулзалт хийх үеэр Гашуунсухайт- Ганцмод боомтын хил дамнасан төсөр замын гүүр барих ажлын тухай хоёр орны засгийн газрын хэлэлцээрт гарын үсэг зурсан. Энэ жил дуусвар болсноор боомтуудын нэвтрэх хүчин чадал 2 дахин нэмэгдэж, нүүрсний экспорт 40 сая тонноор нэмэгдэнэ гэж байгаа. Энэ нь нүүрс дээр тогтдог эдийн засагтай, нүүрсний экспортод тулгуурлан амьдардаг улсын хувьд маш чухал төсөл юм. Мөн өнгөрсөн жил Монгол-Хятадын Шивээхүрэн-Цэхээ хил дамнасан төмөр замын бүтээн байгуулалтын ажлын хэсэг байгуулах санамж бичигт гарын үсэг зурсан байгаа. Тэгэхээр ахиц дэвшилтэй төслүүд мэдээж бас байна.

4. Маш их идэвх санаачилга гаргаж, тодорхой цаг хугацаатай, нарийн төлөвлөгөөтэй ажиллах ёстой

Сэтгүүлч: Удаашралтай байгаагийн гол шалтгаан?

Т.Чулуун-Эрдэнэ: Сая Фү Дань их сургуульд болсон форумд оролцох үеэр бүс ба замын тэргүүлэх хэмжээний стратегич, Фү Дань их сургуулийн профессор Хуан Рэньвэйгээс ярилцлага авахад эн тэргүүнд ярьж буй нь Хятад улс Монгол улсыг дэмжинэ, Монгол улс уул уурхайн түүхий бүтээгдэхүүнээ боловсруулж нэмүү өртөг гаргах хэрэгтэй гэж байна. Мөн улс төрийн тогтвортой байдлаа сайн хангах хэрэгтэй байна гэж байгаа юм. Тэгэхээр манай засгийн газар нэгт хэлсэн бол хийсэн байх хэрэгтэй, хийх гэж байгаа зүйлээ маш их төлөвлөгөөтэй, хийх эзэн нь тодорхой байх ёстой юм байна гэж үзэж байна. Мөн тэр хүний ярианаас ухаарсан зүйл маань гэвэл хоёр тал харилцан ашигтай хамтран ажиллахад хоёр улсын хүний нөөц нь ойролцоо төвшинд байх ёстой юм байна. Тийм учраас Монгол улс бүс ба зам санаачилгын хүрээнд холбогдох мэргэжилтнүүдээ маш сайн бэлдэх хэрэгтэй гэж үзэж байна. Бас нэг саад болж байгаа зүйл нь манайд бүс ба зам санаачилгыг яг хэн хариуцаж байгаа нь ойлгомжгүй байгаад оршино. Цаашдын Хятадын чиг хандлага юу бэ гэхлээр Бүс ба замын хүрээнд Өмнөдийн улс орнуудтай түлхүү хамтарч ажиллах юм байна. Монгол улс хэдийгээр дэлхийн хойд бүсэд байгаа хэдий ч хөгжлийн үзүүлэлт, эдийн засагт тулгараад байгаа саад бэрхшээл нь өмнөдийн улс орнуудтай маш адилхан учраас биднийг нь өмнөдийн улс орнуудад хамааруулж байгаа. Тэгэхээр цаашид бол Хятад улсыг харалгүйгээр өөрсдөө маш их идэвх санаачилга гаргаж, тодорхой цаг хугацаатай, нарийн төлөвлөгөөтэй ажиллах ёстой болоод байна. Хятад улс бол маш том гүрэн, дэлхийн хэмжээний асуудлыг өөрийн улс орны бодлоготойгоо уялдуулж байгаа улсын хувьд бидний ашиг сонирхолд нийцүүлэх гэж толгойгоо гашилгахгүй, тэгэхээр бид өөрөө гарч ирж буй боломжуудыг сайн ашиглаж ажиллах хэрэгтэй. Үгүй бол нэгэнт хоцорсон байгаа хөгжил маань улам хоцорно. Тэгэхлээр бид байгальд ээлтэй ногоон эко сэргээгдэх эрчим хүчний салбарын хөгжлийг төмөр зам, боомтын хөгжилтэйгөө эн тэнцүү авч үзээд урагш ахиулах дорвитой төсөл хөтөлбөр санаачлан хамтран ажиллах хэрэгтэй гэж санагдаж байна.

“Чайна энержи”: Танай УИХ нэгдсэн ойлголцолд хүрч эрх зүйн орчныг бүрдүүлбэл хэлэлцээр хэрэгжинэ

secret0721 — Tue, 12 Nov 2024 14:31:46 +0800

Б.ГАРЬД

Анхны 126 гишүүнтэй УИХ улсын төсвийн хэлэлцүүлгээс болоод олон нийтээс баахан базаахгүй үг сонсох шиг боллоо. Гэхдээ энэ УИХ бүрэн эрхийнхээ хугацаанд улс орны ирээдүйтэй холбоотой олон түүхэн шийдвэрийг гаргана.

УИХ-д суудалтай намууд, гурван намын хамтарсан Засгийн газрын хөтөлбөрт орсон том төслүүд хөдлөх, хэрэгжих эсэх нь УИХ-ын хэрхэн шийдэхээс шууд хамаарна. Эхнээсээ тулаад ирсэн байна. Тэр нь том төслүүдийн эхэнд шахам эрэмбэлэгдсэн

Гашуунсухайт-Ганцмод боомтыг холбох төсөл юм. Эдгээр боомт холбогдохгүй, энэ хэвээр байхад эдийн засгийн тэлэлт ярих нь утгагүй хэрэг болно. Гашуунсухайт-Ганцмод боомтын хил дамнасан холболтын ажлыг дуусгаснаар боомтуудын нэвтрэх хүчин чадлыг хоёр дахин нэмэгдүүлж, нүүрс тээврийг 40 сая тонноор, экспортын орлогыг хоёр дахин нэмэгдүүлэх боломжтой. Тэр утгаараа, нүүрсний экспортоос хамгийн их хамааралтай манай улсын хувьд яахын аргагүй тэргүүлэх төсөл, хамгийн хэрэгцээд хилийн гарц болчихоод байгаа юм. Гэвч боомтуудыг холбож чадалгүй хэлэлцээрийн шатанд 16 жил гацсан. Тухайн үед манайх ч балласан л даа. Харин сүүлийн үед БНХАУ энэ төслийн талаар улс төрийн, эдийн засгийн түвшинд нааштай хандлагатай болоод байна.

Өнгөрсөн долоо хоногт Ерөнхий сайд Л.Оюун-Эрдэнэ БНХАУ-д айлчилж, тус улсын Төрийн зөвлөлийн Ерөнхий сайд Ли Чянтай Шанхай хотод албан ёсны уулзалт хийсэн. Тэр үеэр Гашуунсухайт-Ганцмод боомтын хил дамнасан төмөр замын гүүрийг хамтран барих тухай Монгол Улсын Засгийн газар, БНХАУ-ын Засгийн газар хоорондын хэлэлцээрт талууд гарын үсэг зурж, хүчин төгөлдөр болгосон.

Тэгвэл энэ хэлэлцээрийг хэрхэн үргэлжлүүлж, хэрэгжүүлэх талаар “Чайна энержи” групп Монголын талын ажлын хэсгийн ахлагч, Аж үйлдвэр, эрдэс баялгийн сайд Ц.Туваанд албан бичиг ирүүлжээ. “Чайна Энержи” нь Хятадын эрчим хүчний томоохон групп юм. “Нүүрс, цахилгаан, төмөр зам, боомт, тээвэрлэлт”, “Үйлдвэрлэл, тээвэрлэлт, борлуулалт, нөөцлөх, ашиглалт”, “Нүүрс, цахилгаан, газрын тос, байгалийн хий, химийн үйлдвэрлэл” гэсэн олон чиглэлд цогц үйл ажиллагаа явуулдаг. 2023 оны жилийн эцсийн байдлаар тус групп 310 мянган ажилтантай, нийт хөрөнгийн хэмжээ 2.1 их наяд юань, нүүрс олборлох хүчин чадал жилд 665 сая тн, цахилгаан эрчим хүч үйлдвэрлэх хүчин чадал 320 сая киловатт, өөрийн төмөр замын тээврийн хүчин чадал жилд 600 сая тонн, боомтын нэвтрүүлэх хүчин чадал 290 сая тн, нүүрс-газрын тос химийн үйлдвэрлэлийн хүчин чадал нь жилд 29.3 сая тн болжээ.

Тэгвэл “Чайна Энержи” группын ирүүлсэн “БНХАУ, Монгол Улсын эрчим хүч, хил дамнасан төмөр зам, нүүрсний худалдаа, нүүрсний уурхайн хүчин чадлыг нэмэгдүүлэх хамтын ажиллагааны тухай” уг албан бичигт “…“Чайна Энержи” групп нь 2003 оноос эхлээд Тавантолгой уурхайн төслийг “гурван цогцоор хэрэгжүүлэх”-ээр Монгол Улстай 21 жилийн турш хэлэлцээр хийж байна. Тус групп 2005 онд Монгол Улсын Засгийн газар болон аж ахуйн нэгжтэй хэлэлцэж, Гашуунсухайт төмөр замын маршрутын төлөвлөгөөг баталсан. 2009 оны нэгдүгээр сард Монгол Улсын Засгийн газарт нэгдсэн төлөвлөгөөг бизнесийн хамтын ажиллагааны саналын хамт хүргүүлсэн. Хоёр улсын Төрийн тэргүүн нарыг байлцуулан, талууд 2014 оны наймдугаар сард Хятад, Монголын нарийн царигийн төмөр замын холболтын санхүүжилтийн Үндсэн гэрээнд гарын үсэг зурсан. Улмаар “Чайна энержи” групп 2015 оны нэгдүгээр сард уг гэрээний дагуу Гашуунсухайт төмөр замыг барьж, ашиглалтад оруулсан. Үүнд 7.17 тэрбум юанийн хөрөнгө оруулалт хийсэн. Гэвч Монголын тал урагшаа чиглэсэн төмөр замыг төлөвлөсөн хугацаанд барихгүй байсаар 2020 онд гэрээг өөрчилж, өргөн царигтай барихаар шийдсэн. Ингэж төсөл удаан хугацаагаар зогссон. Үүний улмаас өнгөрсөн 16 жилийн хугацаанд 2.7 тэрбум гаруй юанийн алдагдалд орсон. Одоо Хятад руу өргөн царигаар ачаа тээвэр нэвтрүүлэхтэй холбоотой боомтын бүтээн байгуулалтыг өөрчлөх хүрээнд нарийн царигтай хилийн шалган нэвтрүүлэх талбай, шинэ өргөн царигтай хилийн шалган нэвтрүүлэх талбай, шилжүүлэн ачих талбайг өөрчлөн засварлах зэрэг хэд хэдэн дагалдах төслүүдэд 4.1 тэрбум гаруй юанийн хөрөнгө оруулалт шаардагдана. Өнөөдөр Монгол Улсын Засгийн газрын үйл ажиллагааны хөтөлбөрт Гашуунсухайт-Ганцмод боомтын төмөр замын холболтын асуудлыг 14 том төслийн жагсаалтын эхэнд оруулж, “гурван цогцоор хэрэгжүүлэх” хамтын ажиллагааг хөгжүүлэхэд эерэг нөлөө үзүүлж байна” гэжээ.

Түүнчлэн “…БНХАУ, Монгол Улсын урт хугацааны найрсаг харилцаа, эрчим хүчний салбарын тасралтгүй, гүн гүнзгий хамтын ажиллагааг харгалзан үзэж, мөн Монгол Улсын урагшаа чиглэсэн төмөр зам өргөн царигийг ашиглах болсон түүхэн онцлог, улс төрийн нөхцөл байдлыг бодолцсоныг БНХАУ-ын тал ойлгож, гомдол гаргах хуулийн арга хэмжээг өнөөг хүртэл аваагүй болно. Түүхэн асуудлуудыг яриа, хэлэлцээний замаар шийдэж, урт хугацааны боломжит худалдааны хэлэлцээр, тогтвортой, хүчин чадлыг нэмэгдүүлсэн хамтын ажиллагаагаар дамжуулан төслийн эдийн засгийн үр ашгийг баталгаажуулах боломжтой гэдэг байр суурь баримталж ирлээ.

2024 оны аравдугаар сарын 14-нд хийсэн хоёр талын уулзалтын үр дүн, ажлын явцыг бүрэн дүгнэсэн. Үүний үндсэн дээр дараах саналыг албан ёсоор дэвшүүлж байна.

Үүнд:

Нэг. Хууль эрх зүйн тогтвортой орчин, гэрээг хэрэгжүүлэх нөхцлийн баталгаа:

Төсөл хэрэгжих хугацаанд зохистой ашиг хүртэх нь хоёр талын урт хугацааны, тохиромжтой, тогтвортой хамтын ажиллагааны үндэс юм. Талууд “гурван цогцоор хэрэгжүүлэх” хамтын ажиллагааг урт хугацааны хамтын ажиллагаатай уялдуулж, харилцан дэмжлэг үзүүлж, харилцан хамгаалахад хүчин чармайлт гаргах нь зүйтэй юм.

Чингэхдээ танай УИХ нэгдсэн ойлголтод хүрч, дэмжлэг үзүүлэх шаардлагатай юм. Ялангуяа нүүрсний худалдаа, нүүрсний уурхайн хүчин чадлыг нэмэгдүүлэх хамтын ажиллагааг хөгжүүлэхэд хууль эрх зүйн тогтвортой орчныг бүрдүүлж, хамтын ажиллагааны хэлэлцээр байгуулж, хэлэлцээрийг хэрэгжүүлэх нөхцөлийг бий болгох нь чухал юм.

Хоёр. Урт хугацааны худалдааны гэрээ:

“Чайна энержи” групп шударга, бодит байдалд үндэслэн урт хугацааны худалдааны хэлэлцээрт үнэ, үргэлжлэх хугацаа, хэмжээ, чанарыг оруулж, баталгаажуулах саналтай байна.

1. Хоёр талын байгуулах нүүрсний худалдааны гэрээнд “Чайналкогийн урт хугацааны гэрээний үнэ”-ийн үнэ тогтоох механизмыг ашиглах нь зүйтэй. Энэ механизм нь зах зээлийн зарчим болон олон улсын туршлагад нийцсэн, удаан хугацаанд зах зээл дээр батлагдсан, ойлгоход ч, хэрэгжүүлэхэд ч хялбар. Энэхүү гэрээний дагуу Монголын коксжих нүүрсний эцсийн үнэ нь цаашид ямар ч үнэ тогтоох механизм батлагдахаас үл хамааран “Чайналкогийн урт хугацааны гэрээний үнэ” механизмаар бий болсон үнээс өндөр байх ёсгүй юм.

“Чайна энержи” групп Хятад, Монголын хил дамнасан төмөр зам зэрэг дэд бүтцэд хамгийн их хөрөнгө оруулсан. Монголын нүүрсний зах зээлд хамгийн өндөр хувийг эзэлдэг. Хамтын ажиллагааны хамгийн урт хугацааны стратегийн түншийн хувьд Монголын нүүрсний зах зээлийн хамгийн өрсөлдөхүйц, урт хугацааны худалдааны гэрээний үнээр гэрээ байгуулах нь зүйтэй.

2. Гашуунсухайтын төмөр зам баригдаж ашиглалтад орсноос хойш 16 жил алдагдалтай ажиллаж байна. Цаашид холбож, түүнийгээ ашиглалтад оруулахад дахин гурван жил шаардлагатай. Шударга, бодит, эрх тэгш зарчмыг баримтлан талууд нүүрсний худалдааны тогтвортой, урт хугацааны хамтын ажиллагааны хугацааг 16-20 жил байх саналыг гаргаж байна.

3. Нүүрсний худалдааны хэмжээг хоёр үе шаттайгаар хэрэгжүүлнэ. Нэгдүгээр үе шат нь олборлолтын хүчин чадлыг нэмэгдүүлэхээс өмнөх буюу 2025-2029 он хүртэл бөгөөд энэ хугацаанд худалдааны нийт хэмжээ 27 сая тн байх, хоёр дахь үе шат нь хүчин чадлыг нэмэгдүүлсний дараах 2030 оноос эхлэх үед худалдааны хэмжээ жил бүр 20 сая тн-оос багагүй байх нь зүйтэй.

4. Нүүрсний чанарын тухайд Хятадын хэрэглэгчийн нүүрсний стандартыг баримталж, коксжих нүүрсний төрлийг үндэслэл болгоно. Чанарыг шалган хүлээн авахдаа Монголын нүүрсний экспортын лабораторын стандартыг баримтална. Талууд Хятадын талын боомтоор орж ирэхэд дахин шалгах механизмыг бий болгож, чанарын зөрүүг олон улсын жишгийн дагуу шийдвэрлэнэ.

Гурав. Нүүрсний уурхайн хүчин чадлыг нэмэгдүүлэх:

1. Монгол Улсын хуулиар стратегийн ашигт малтмалын нөөцөд гадаадын хөрөнгө оруулалтыг хязгаарласан. Үүний улмаас “Чайна энержи” групп Тавантолгой нүүрсний ордыг эзэмших эрх, хувь эзэмших болон хөрөнгө оруулалтын хамтын ажиллагааны санал гаргах боломжгүй болсон.

2. Нүүрсний уурхайн хүчин чадлыг нэмэгдүүлэх хамтын ажиллагаа нь нүүрсний олборлолтын хэмжээг нэмэгдүүлэх, нөхцөл нь бүрдсан талбайд хурдацтай олборлолт хийж, хоёр шинэ уурхайн талбайд олборлолт хийхийг дэмжих нь зохистой. Нөөц ихтэй талбайг давуу эрхээр сонгож, богино хугацаанд ашиглалтад оруулж, олборлолтын хэмжээг нэмэгдүүлэх санал дэвшүүлж байна.

Дөрөв. Төмөр замын холболт:

-Ганцмод-Гашуунсухайтын төмөр замыг Хятадын төмөр замын сүлжээнд оруулсан. Бүтээн байгуулалтын дараа дотоодын нүүрс тээвэрлэлтийн тогтвортой байлгах урьтач нөхцөлийг бий болгож, тээвэрлэх хүчин чадал, урсгалыг үндэслэн худалдааны бусад бизнесийн хэрэгцээг хангахад хүчин чармайлт гаргана” гэжээ.

Эцэст нь “…Хоёр талын хамтын ажиллагааны түүх, төслийн хэрэгжилтийн олон улсын практикт үндэслэн, шударга, харилцан итгэлцэл, харилцан ашигтай байх хамтын ажиллагааны зарчимд тулгуурлан дээрх саналуудыг дэвшүүлэв. Монголын тал “гурван цогцоор хэрэгжүүлэх” хамтын ажиллагааг урагшлуулахыг дэмжинэ гэдэгт найдаж байна. Хамтын ажиллагааны гэрээ байгуулсны дараа “Чайна энержи” групп өнгөрсөн хугацаанд учруулсан бодит хохирол болоод холбогдох орлогын алдагдлыг нэхэмжлэхгүй” гэсэн байна.

Эх сурвалж: “Зууны мэдээ” сонин

Ерөнхийлөгчийн Туркменистаны айлчлал өндөрлөж, Ерөнхий сайдын Пакистан дахь уулзалтууд эхэллээ

secret0721 — Tue, 15 Oct 2024 15:20:48 +0800

Ерөнхийлөгч У.Хүрэлсүхийн Туркменистан улсад хийсэн төрийн айлчлал өндөрлөлөө. Айлчлалын хүрээнд Монгол Улс, Туркменистан улсын төрийн тэргүүн нар ганцаарчилсан уулзалт болон албан ёсны хэлэлцээ хийж, хоёр улсын харилцаа болон бүс нутаг, олон улсын тавцан дахь хамтын ажиллагааны өргөн хүрээний асуудлаар санал солилцож, айлчлалын дүнгээр хамтарсан мэдэгдэл гаргалаа. Түүнчлэн Монгол Улсын Ерөнхийлөгч У.Хүрэлсүх Туркменстаны ард түмний үндэсний удирдагч, Туркменистаны Халк Маслахат-ын дарга Гурбангули Бердымухамедов зэрэг албаны хүмүүстэй уулзлаа. Мөн “Монгол-Туркменистаны бизнес форум”-ыг амжилттай зохион байгуулж, хоёр орны бизнес эрхлэгчид, баялаг бүтээгчид хоорондын хэлхээ холбоог тогтоосон нь цаашид худалдаа, хөрөнгө оруулалт, бизнесийн хамтын ажиллагааг өргөжүүлэн хөгжүүлэхэд чухал ач холбогдолтой үйл явдал боллоо. 1992 онд Монгол Улс болон Туркменистан Улсын хооронд дипломат харилцаа тогтоосноос хойшхи хугацаанд анх удаа хэрэгжсэн энэхүү дээд түвшний айлчлал нь хоёр улсын харилцаа, хамтын ажиллагааны шинэ эхлэлийг тавьсан чухал ач холбогдолтой айлчлал болж өндөрлөсөн байна.
Ерөнхий сайд Л.Оюун-Эрдэнэ Исламын Бүгд Найрамдах Пакистан Улсын нийслэл Исламабад хотноо 2024 оны аравдугаар сарын 15-16-нд болох ШХАБ-ын гишүүн орнуудын Засгийн газрын тэргүүн нарын зөвлөлийн өргөтгөсөн хуралдаанд ажиглагчаар оролцож байна.
Ерөнхий сайд Л.Оюун-Эрдэнэ Пакистан улсад ажиллах үеэр Монгол Улс, Оросын холбооны улс, Бүгд найрамдах Хятад ард улсын Засгийн газрын тэргүүн нарын гурван талт уулзалтад оролцож, Пакистан улсын Ерөнхий сайд Шехбаз Шариф, ОХУ-ын Засгийн газрын дарга М.В.Мишустин, БНХАУ-ын Төрийн зөвлөлийн Ерөнхий сайд Ли Чян нартай тус тус хоёр талын уулзалт хийхээр төлөвлөжээ.

Австралийн Сенатын танхимын ерөнхийлөгч манай улсад албан ёсны айлчлал хийнэ

УИХ-ын дарга Д.Амарбаясгалангийн урилгаар Австралийн Холбооны Улсын Парламентын Сенатын танхимын Ерөнхийлөгч Сюзан Лаянс энэ сарын 16- 19-ний өдөр Монгол Улсад албан ёсны айлчлал хийнэ. Айлчлалын хүрээнд Улсын Их Хурлын дарга Д.Амарбаясгалан болон Сенатын танхимын Ерөнхийлөгч С.Лаянс нар хоёр улсын хууль тогтоох дээд байгууллага хоорондын хамтын ажиллагааг өргөжүүлэн хөгжүүлэх асуудлаар өргөтгөсөн уулзалт хийнэ. Мөн айлчлалын үеэр Австралийн Холбооны Улсын Сенатын танхимын Ерөнхийлөгч С.Лаянс Монгол Улсын Ерөнхийлөгч У.Хүрэлсүхэд бараалхах юм байна.
Энэхүү айлчлал нь Австралийн Холбооны Улсын Сенатын Ерөнхийлөгчийн түвшинд хэрэгжиж буй анхны айлчлал гэдгээрээ онцлог бөгөөд Монгол, Австралийн хооронд улс төрийн яриа хэлэлцээ, харилцан итгэлцлийг бэхжүүлэхэд чухал ач холбогдолтой.
Эх сурвалж: “Зууны мэдээ” сонин

Монгол Улсын Ерөнхийлөгч У.Хүрэлсүх, ОХУ-ын Ерөнхийлөгч В.В.Путин нар хэлэлцээ хийв

secret0721 — Wed, 04 Sep 2024 14:11:19 +0800

Монгол Улсын Ерөнхийлөгч Ухнаагийн Хүрэлсүх, ОХУ-ын Ерөнхийлөгч В.В.Путин нар Төрийн ордонд албан ёсны хэлэлцээ хийлээ.
Ерөнхийлөгч У.Хүрэлсүх ОХУ-ын Ерөнхийлөгч В.В.Путиныг Халх голын байлдааны ялалтын 85 жил, Монгол, Оросын “Улаанбаатар төмөр зам” хувь нийлүүлсэн нийгэмлэг үүсэн байгуулагдсаны 75 жил, хоёр орны хооронд дипломат харилцаа тогтоосны түүхт 100 жилийн ойг үргэлжлүүлэн тэмдэглэх хүрээнд албан ёсоор айлчилж байгаад талархал илэрхийлэв.
Хоёр улсын төрийн тэргүүн харилцаа, хамтын ажиллагааны өнөөгийн байдлыг дүгнэж, хамтын ажиллагааг эдийн засгийн агуулгаар баяжуулах, түүний дотор түлш, эрчим хүч, зам тээвэр, байгаль орчин, соёл, боловсрол, эрүүл мэнд, хүмүүнлэгийн салбарын харилцааг улам эрчимжүүлэх талаар ярилцлаа.
Айлчлалын хүрээнд Газрын тосны бүтээгдэхүүн нийлүүлэх салбарт хамтран ажиллах тухай, Дулааны гуравдугаар цахилгаан станцын өргөтгөл, шинэчлэлийн төслийн зураг төсөл, төсөв боловсруулах тухай Засгийн газар хоорондын хэлэлцээр байгуулж байгааг сайшаан тэмдэглэв.
Хэлэлцээний үеэр Ерөнхийлөгч У.Хүрэлсүх “Эгийн голын усан цахилгаан станц”-ыг барих ажил хоёр талын хүчин чармайлтын үр дүнд урагшилж байгааг тэмдэглээд, Эгийн голын төслийг онцгойлон анхаарч, байгаль орчны үнэлгээний асуудлыг цогцоор нь авч үзэхийн тулд хоёр талын ажлын хэсгийг байгуулахаар тохиролцож, Санамж бичиг байгуулж байгааг өндрөөр үнэлэв.
Энэ оны сүүлээр Монгол Улс, Евроазийн эдийн засгийн холбоо хооронд байгуулах Чөлөөт худалдааны түр хэлэлцээр худалдааны эрх зүйн орчныг тэлж, хамтын ажиллагааг өргөжүүлэх шинэ боломж бий болгоно гэж итгэж байгаагаа талууд илэрхийлэв.
Монгол, Орос, Хятадын Эдийн засгийн коридор байгуулах ажлыг эрчимжүүлэх нь чухал гэдэгт талууд санал нэгдэж, гурван улсын холбогдох байгууллагууд холбогдох төслүүдийг цаг үеийн хэрэгцээ, шаардлагад нийцүүлэн шинэчилж буйг сайшаан тэмдэглэлээ.

БНХАУ-ын дэд дарга Хань Жөн Монгол Улсад айлчилна

secret0721 — Tue, 03 Sep 2024 18:29:39 +0800

Монгол Улс, БНХАУ-ын хооронд дипломат харилцаа тогтоосны 75 жилийн ойн хүрээнд Монгол Улсын Засгийн газрын урилгаар БНХАУ-ын дэд дарга Хань Жөн 2024 оны есдүгээр сарын 6-8-нд Монгол Улсад айлчилна.

Хурхиралтаасаа салах цаг болсон

secret0721 — Mon, 26 Aug 2024 13:09:10 +0800

Хурхирахыг хэвийн үзэгдэл гэж хүмүүс эндүүрэх нь элбэг байдаг ч энэ нь эрүүл мэндэд ноцтой үр дагавартай.
- Хурхирах гэдэг нь унтаж байгаа хүний амьсгалах үедээ гаргаж буй хажуугийн хүмүүст сонсогдох маш таагүй дуу авиа юм. Энэхүү чимээ нь хэлний уг болон залгиурын арын хананд зөөлөн тагнай хүүхэн хэлний чичирхийллээс үүсдэг. Унтах үед залгиурын арын ханын зөөлөн эд болон хэлний булчингууд сулардаг.
Хэл арагш унаж агаар дамжих зам нарийсдаг. Нарийхан замаар агаар дамжихад агаарын хөдөлгөөн хурдсан хуйлрал үүсгэж булчингууд нэг нэгнийхээ эсрэг чичирхийлснээр хурхирах дуу авиа үүсдэг. Бачуухан замаар саатсан агаарын даралт ихэсвэл хурхиралт улам чангардаг. Унтаж амарч байх үедээ хурхирснаар бүрэн тайван нойрсож чадахгүй.
Унтах хэмнэл алдагдсанаар өдөр нойрмоглох, гүйцэт амрахгүй гэх мэт наад захын зовиурууд бий болдог. Цаашилбал эрүүл мэндэд ноцтой нөлөөлж яваандаа зүрх судасны өвчин, зүрхний шигдээс, артерийн даралт нэмэгдэх зэргийг үүсгэх эрсдэлт хүчин зүйл болдог.
Нойрон дунд амьсгал бөглөрөх нь зүрх судасны өвчний халгаат хүчин зүйлийг нэмэгдүүлж артерийн даралт ихсэх, ой ухаан муудах, анхаарал төвлөрөлт сарних, ажлын чадвар буурах, аваар осолд орох, гэр бүлийн бухимдал зэрэгт хүргэдэг.

Хэн нэгэн танд хурхирч байгаа тухай чинь гомдоллож хэлж байсан
Танд өөрт чинь унтаж байх үедээ амьсгаа багтрах буюу амьсгал бөглөрөх тохиолдол байсан
Та өдөржингөө хэт их нойрмоглодог
Таны ажлын чадвар буурах болон анхаарал төвлөрөлт сарних тохиолдол байсан зэрэг шинж тэмдгүүдийг өөрөө мэдрэх буюу ойр дотныхон чинь хэлбэл нойрон дунд амьсгал бөглөрөх хам шинжтэй илэрсэн бол заавал эмчлэх хэрэгтэй.

Хятадын бие даан бүтээсэн "Сян Юнь" агаарын хөлөг туршин нисч эхэллээ

secret0721 — Mon, 26 Aug 2024 12:48:02 +0800

Саяхан Хятад улсын бие даан бүтээсэн "Шян Юнь" AS700 нисгэгчтэй агаарын хөлөг 1000 км нисч, муж, бүс нутгийг дамнасан хол зайн анхны нислэгээ хийж, Гуаншигийн Яншөүд газардав. 8-р сарын 23-наас эхлэн "Шян Юнь" агаарын хөлөг энд 20 хоногийн турш туршилтын журмаар ажиллах юм.

"Шян Юнь" AS700 нисгэгчтэй агаарын хөлгийн туршилтын ажиллагааны үеэр өдөр тутмын нислэг үйлдэх хугацаа нь 12:30-14:30 цагийн хооронд болох ажээ.

AS700 нисгэгчтэй агаарын хөлөг нь Хятад улсын бие даан бүтээсэн иргэний нисгэгчтэй агаарын хөлөг юм. Энэ нь нүүрстөрөгч багатай, аюулгүй, хэмнэлттэй онцлог шинжтэй бөгөөд ойрын зайд босоо хөөрөлт, буулт хийх боломжтой. Агаарын хөлгийн хөөрөх хамгийн дээд жин нь 4 тонноос дээш, хамгийн их нислэгийн зай нь 700 километр, 10 гаруй хүн тээвэрлэх чадалтай. Төлөвлөгөөний дагуу энэ онд анхны агаарын хөлгийг нийлүүлнэ.

Словени улсын Ерөнхийлөгчийн айлчлал мотоцикльтой үргэлжлэв

secret0721 — Thu, 22 Aug 2024 13:36:38 +0800

Т.САЙХАН
Бүгд Найрамдах Словени Улсын Ерөнхийлөгч Др.Наташа Пирц Мусар наймдугаар сарын 20-21-ний өдөр Монгол Улсад айлчилж, хоёр улсын Ерөнхийлөгч нар яриа хэлэлцээ хийсэн билээ.
Төрийн айлчлалын төгсгөлд буюу өчигдөр Словени улсын анхны эмэгтэй Ерөнхийлөгч Монгол Улсын Ерөнхийлөгч У.Хүрэлсүхийн хамт мотоцикль хөлөглөн Төв аймгийн Эрдэнэ сумын нутагт байрлах Цонжинболдогт зочилжээ. Энэ нь манай улсад айлчлан ирсэн гадаад улсын төрийн тэргүүн мотоциклоор аялсан анхны тохиолдол болж байна.
Эх сурвалж:www.polit.mn